ភ្នំពេញ៖ កាលពីយប់ថ្ងៃទី២៣ ខែមីនា ឆ្នាំ២០១៨
មន្ត្រីពេទ្យទាហានដែលមានឋានន្តរស័ក្ដិជាអនុសេនីយ៍ឯក (ស័ក្តិ៣)
ម្នាក់ បានធ្វើទារុណកម្មទៅលើនារីជាសង្សាររបស់ខ្លួន
ដោយបានប្រើប្រាស់អំពើហិង្សា ដោយបានយកខ្សែ និងកន្សែងចងដៃ ចងជើង
ចងក ព្រមទាំងចាក់សោបង្ខាំងនៅក្នុងបន្ទប់ជួលរួចរត់គេចខ្លួនបាត់
បង្កការភ្ញាក់ផ្អើលទាំងយប់ ។
លោក យឹម សារ៉ាន់ អធិការនគរបាលខណ្ឌពោធិ៍សែនជ័យបានប្រាប់អោយដឹងថា
ជនសង្ស័យមានឈ្មោះ អឹក សំអាង អាយុ៣០ឆ្នាំ មុខបរ
ជាមន្ត្រីពេទ្យទាហានពាក់ស័ក្តិ៣ ស្នាក់នៅភូមិជ្រៃកោង
សង្កាត់ចោមចៅ២ ខណ្ឌពោធិ៍សែនជ័យ មានស្រុកកំណើត នៅឃុំរាមអណ្តើក
ស្រុកគិរីវង្ស ខេត្តតាកែវ ។
ចំណែកនារីរងគ្រោះឈ្មោះ ស.យ អាយុ២១ឆ្នាំ
មុខរបរ ក្រុមហ៊ុនមួយ មានស្រុកកំណើត ស្រុកពញឮ ខេត្តកណ្តាល ។លោកអធិការបានបន្ដថា នារីរងគ្រោះត្រូវបានម្ចាស់ផ្ទះជួលឃើញ
ក៏បានខលប្រាប់សមត្ថកិច្ចភ្លាមៗនោះ
កម្លាំងនគរបាលប៉ុស្តិ៍ចោមចៅ២ ខណ្ឌពោធិ៍សែនជ័យ
បានចុះទៅដល់កន្លែងកើតហេតុ ជួយរំដោះនារីរងគ្រោះទាន់ពេលវេលា
និងតាមចាប់វាយខ្នោះបុរសជនសង្ស័យបានភ្លាមៗផងដែរ ។ជនសង្ស័យត្រូវបាននគរបាល យកទៅសួរនាំបន្តទៀត ដើម្បីចង់ដឹងមូលហេតុពិតប្រាកដ ដែលនាំឲ្យមានករណីនេះកើតឡើង ៕
